Беслæны дарддæр нывыл кæнынц «Зæдты сахар»

«Зæдты сахары» сабырдзинад рæстæгмæ аивта арæзтадон техникæйы уынæр. Ам дарддæр цæуынц аивгæнæн куыстытæ, специалисттæ архайынц фæзуат банывыл кæныныл. Бындурон цалцæджы сæйраг нысантæй иу — «Хъыджы бæласы» рацарæзт.  Хæстæг рæстæг специалисттæ райхалдзысты цыртдзæвæны быннаг хай æмæ йæ бындур. Уыцы иу рæстæг куыстытæ цæуынц алфамбылайы фæзуатыл. Аразджытæ базилдзысты ингæнты алыварс бынатмæ, нысаддзысты бæлæстæ, сараздзысты донпырхгæнæн системæ, баивдзысты рухсæнæнтæ. Ног кæнынц фистæгæй цæуджытæн фæндæгтæ, зилынц газонтæм. Подрядон куыстуаты специалисттæ сæвæрдтой асфальт хæдтулгæтæ уромæн сæрмагонд бынаты, 700 метрæй фылдæр сæвæрдтой бордюртæ. Ныртæккæ та цæуынц брюсчаткæйæн бындур аразыны куыстытæ. Техникон цæттæдзинад у 50%. Куыстытæ цæуынц «Цæгат - Кавказаг федералон зылды райрæзт»-ы паддзахадон программæйы фæлгæты. Проект конд у æхсæнадон организаци «Беслæны мадæлты» уæнгты хъуыдытæ хынцгæйæ. Æппæт къæпхæнтæ дæр фæуынвæнд кæнынц ацы аз. Кæд æмæ мысæн мадзæлттæм рацарæзт сæххæст кæнын нæ бантыса, уæддæр саударæн вахтæ ацæудзысты фæткмæ гæсгæ.