Атарты Георгий федта Дигора ӕмӕ садоны ӕвзӕр боныхъӕды фӕстиуджытӕ

Донивылды аххосæй асфальт ныппырх, къанау йæ былтæй акалд. Бынаты кусы уæззау техникæ. Специалистты архайд кæронмæ фæхæццæ кæны. Ахӕм уавӕр Дигорайы сæвзæры æрвылаз. Знон изӕр цалдæр сахатмæ бахъуыд уаццаг сæхгæнын, уыцы рӕстӕгмӕ фæндаггон службæйы специалисттæ асфальт цъыфӕй ӕмӕ ламийæ ссыгъдӕг кодтой. Хицауады сӕрдары хӕдивӕг Атарты Георгий уыд бынаты, аныхас кодта кусджытимæ. Хæстæг бирæ хъӕууонхӕдзарадон быдыртӕ ис, доны бын фесты, къанау байдзаг æмæ фæндаг сæхгæдта. Зӕронд хæтæлтæ гуырахст нӕ баурӕдтой ӕмӕ ратыдтой. Ивд æрцæудзысты ацы аз, æрмæст ма хъæуы проект бацæттæ кæнын. Ахӕм уавӕр сæвзæрд Садоны дӕр. Ӕрмӕст къанауимӕ нӕ, фӕлӕ цӕугӕдонимӕ. Тæрккъæвдаты аххосæй фӕндаг доны бын фæцис. Ныртӕккӕ цæугæдоны ӕмвӕзад фæкъаддæр, специалисттӕ бавнæлдтой былгæрæттæ фидаргæнæн куыстытæм. Фӕлӕ уый ӕппӕт нӕу. Атарты Георгий бабар кодта былгӕрӕттӕ æххæстæй сфидар кӕнынӕн проект саразын. Райдайын фæнд кæнынц фидæны аз, егъау куыст домы бæстон цæттæдзинад. Синоптикты хъусынгæнинагмæ гæсгæ уарынтæ ахæсдзысты къуырийы кæронмæ. Хæххон бынæтты кусын æнцон нæу, фӕлӕ специалисттӕ бæстон архайынц, цӕмӕй дыккаг хатт донивылд ма ' рцӕуа. Фыццаджыдӕр фӕндаг хъуамæ уа æдас, фӕнысан кодта вице-премьер. Цӕрӕн пунктты уавӕрмæ дарддӕр уыдзæн бæстон цæстдард. Кцойты Тамилæ, Артур Сулоев, Къомайты Сослан