Ирон чындзæхсæвы кæфтытæ

Ивгъуыд æмæ фидæн чи баиу кæны, уыдонæй иу у националон уæлæдарæс. Ирон разгæмттæн ис хъæздыг истори. Суанг дзы скифты дуджы сæвзæрд дæр бæрæг дары. Абон уыцы рæсугъд къаба скæнынц чызджытæ чындзы цæугæйæ. Цавæр аргъ кæнынц ныртæккæйы разгæмттæн, уый базыдта Хъуысаты Мæдинæ. Ахæм видеоæрмæджытæ æппынæдзух дæр фенæн ис социалон хызæгты. Хъыгагæн, нæ фыдæлтæ нын цы рæсугъд æгъдау ныууагътой, уыдонмæ нæ фæсивæдæй иуæй-иутæ куыдфæндыйы цæстæй кæсынц. Раздæр-иу чызгæн йæ къухмæ баныдзæвын дæр худинаг уыд. Ныр сарæх сты æндæр нывтæ. Чындзæхсæвы сæ цард кæмæн баиу, уыдонæн сæ бæрæгбон æнæ «медляк», зæгъгæ, кафтæй нал фидауы. Чындз - ирон национ уæлæдарæсы, лæппу дæр - къæрццарæзт æмæ... медляк. Музыкалон фæлыст, кæй зæгъын æй хъæуы, фæсарæйнаг. Хабæрттæ дисы, растдæр зæгъгæйæ та, сагъæсы кæй æфтауынц, уыдонæй иу у Дзлиаты Дзерассæ. Кусы Абайты Васойы номыл Цæгат Ирыстоны гуманитарон æмæ социалон иртæстыты институты фольклор æмæ литературæйы хайады. Чындзæхсæвы ногдзинæдтæн ссары æрмæст иу ном - худинаг. Ирон национ уæлæдарæс æрвылбоны халат, мыййаг, нæу. Ис ын арф æмæ, æнусты сæрты чи `рхæццæ, ахæм удварны мидис. Чындздзоны гуырвидауц уæнгтыл бæргæ хорз фæфидауы, фæлæ йын чызг йæ уыцы кад зоны æви нæ, уый дыууæйыл вæййы. Раздæр иу чызджытæ разгæмттæ сæхæдæг хуыдтой. Ныр сын æххуысæн бирæ хуыйæн æрмадзтæ фæзынд. Нæ фæндаг сыл ракодтам. Иудзырдæй, ирон национ уæлæдарæсы истори æмæ кад, æнæмæнг, бахъахъхъæнын хъæуы. Уый къухы бафтдзæн уæд, æмæ сæ кæстæртæ куы зоной. Уый раиртасынæн...