Цӕгат Ирыстоны райдыдтой балы тыллӕг ӕмбырд кӕнын

Ацы зæхх хонынц балы сахар. 27 гектарыл дзы зайы 22 мин бӕласы — 7 хуызы. Ахӕм хъӕздыг тыллӕг хӕдзарады ӕмбырд кӕнынц фыццаг хатт. Ацы аз къӕвдаджын уалдзæг скодта, фӕлӕ, специалистты ныхӕстӕм гӕсгӕ, дыргътыл уый ницы хуызы фӕзынд. Ныртӕккӕ ӕрхӕццӕ сорт «донецкий уголек»-ы рад. У æнцондард æмæ тынг хӕрзад. Ахæм ном ыл — гагадыргъты тар хуызы тыххæй сæвæрдтой. Ныртӕккӕ дыргъдоны кусы 4 бригады. Ам фӕрсӕй-фӕрстӕм — фӕлтӕрдджын ӕмӕ райдайгӕ дыргъдонгӕстӕ. Фӕсивӕд ардæм ӕрбацӕуынц сӕрды каникулты. Студенттӕн бантысы баулӕфын дӕр ӕмӕ бафыдӕбон кӕнын дӕр. Рӕстӕмбис нымадӕй иу адӕймаг сменӕмӕ ӕрӕмбырд кӕны 10 асыччы. Кæд 8 сахаты хуры тӕвдмӕ арвитын бахъæуы, уӕддӕр ӕмбырдгӕнджытӕ хъаст нӕ кӕнынц, иумӕ кусын хъӕлдзӕгдӕр у. Иу бӕласӕн йӕ бон у 30 килограммы онг тыллӕг раттын. Фыццаг бакастӕй куыст зыны хуымӕтӕг. Фӕлӕ ӕцӕгӕй та — ӕнӕхъӕн зонадау. Ахсджиаг у къалиу ӕмӕ дыргъæн йӕхи дæр ма бахъыгдарын Тӕрхӕджытӕм бахауыны размӕ бал ацӕуы басгӕрсты цалдӕр къӕпхӕны. Гагадыргъты бæрæг кæнынц пестицидтӕ, уӕззау згъӕртӕ ӕмӕ цӕххытæ. Кооператив «Де-Густо»-йы ныридӕгӕн ӕрӕмбырд кодтой 3 тоннӕйы тыллӕг. Фæлæ нырма бирӕ куыст ис, рӕстӕмбис нымадӕй 2 къуырийы бацахсдзӕн. Ахӕм куыстуӕттӕ ӕххуыс кӕнынц национ проект «Технологион ӕгъдауӕй хӕлцадон ӕдасдзинад хъахъхъӕныны» нысантӕ ӕххӕст кӕнынӕн.