Цæгат Ирыстоны райдыдта лингвистон-этнокультурон лагеры сменæ

Хъæлдзæг хъæзтытæ, цымыдисаг дæсныйадæвдисæг ахуыртæ æмæ ног хæлæрттæ. Дауиаты Валерия лагеры ныридæгæн дыккаг хатт ис. Чызг æппынæдзух фæархайы алыхуызон æркастыты æмæ олимпиадæты. Йæ зонындзинæдтæ равдисы мадæлон æвзаг æмæ культурæ зонынæй. Æхсызгон ын у ногæй ам уæвын, пайдаимæ йæ рæстæг æрвитын. «Иры фидæн»-ы йæ каникултæ æрвиты Джызæлы фыццæгæм скъолайы ахуыргæнинаг Цопанаты Азæмæт дæр. Уый йæ арæхстдзинад равдыста ирон аив дзырды сфæлдыстадон æркаст «Амыраны рухс»-ы. Бацæттæ йæм кодта Хетæгкаты Къостайы уацмыс. Куыд зæгъы афтæмæй, ахæм мадзæлттæ хорз фадат дæттынц куыд баулæфынæн, афтæ зонындзинæдтæ дæр фæфылдæр кæнынæн. 18 боны сывæллæттæм æнхъæлмæ кæсы хъæздыг программæ . Сараздзысты сын дæсныйадæвдисæг ахуыртæ кафынæй, театралон арæхстдзинадæй, мультипликацийæ. Бæлвырддæр базонгæ уыдзысты нæ æгъдæуттимæ, фæхъæздыгдæр кæндзысты мадæлон æвзагæй сæ зонындзинадтæ. Уыимæ ма цæудзысты балцыты æмæ экскурситы нæ республикæйы аивдæр бынæттæм. Сабиты фæллад суадзынæн ам ис æппæт æмбæлгæ уавæртæ. Семæ кусдзысты фæлтæрдджын ахуыргæнджытæ. Ацы аз лингвистон - этнокультурон лагерь «Иры фидæн»-ы архайдзысты 35 скъоладзауы. Уыдон афæдзы дæргъы сæхи хорз равдыстой алыхуызон культурон мадзæлтты. Ныр хъæлдзæг æмæ цымыдисæй арвитдзысты сæ каникултæ. Æхсызгон æнкъарæнтимæ бахиздзысты ног ахуыры азмæ æмæ сæ къухты ноджы фылдæр æнтыстдзинæдтæ бафтдзæн.