Молитва Оптинских старцев о даровании молитвы Иисусовой

Молитва Оптинских старцев о даровании молитвы Иисусовой. Го́споди Иису́се Христе́, Сы́не Бо́жий! И́мени Твоему́ покланя́ются а́нгели и челове́цы, Твоего́ и́мени трепе́щут а́дския си́лы, Твое́ и́мя ве́рное ору́жие на прогна́ние супоста́та, Твое́ и́мя попаля́ет грехи́ и стра́сти, Твое́ и́мя подае́т си́лу в по́двигах, собира́ет воеди́но разсе́янный у́м и, во исполне́нии за́поведей Твои́х, обогаща́ет доброде́телями, Твое́ и́мя твори́т чудеса́ и соединя́ет на́с с Тобо́ю, да́рует ми́р и ра́дость о Ду́хе Свято́м, а в жи́зни бу́дущей — Ца́рство Небе́сное. Сего́ ра́ди я́, недосто́йный ра́б Тво́й, молю́ся Тебе́: прожени́ от на́с неве́дение духо́вное, просвети́ позна́нием Боже́ственной и́стины и научи́ на́с незаблу́дно, во смире́нии, внима́тельно, с чу́вством покая́ннаго сокруше́ния, уста́ми, умо́м и се́рдцем твори́ти непреста́нно моли́тву сию́: «Го́споди Иису́се Христе́, Сы́не Бо́жий, поми́луй мя́, гре́шнаго». Ты́ бо ре́кл еси́, Го́споди, пречи́стыми уста́ми Твои́ми: «А́ще что́ про́сите во и́мя Мое́, А́з сотворю́». Се́, моли́твами Пречи́стыя Ма́тери Твоея́, святи́теля Иоаса́фа Белогра́дскаго, святи́теля Никола́я Мирлики́йскаго, преподо́бнаго Серафи́ма Саро́вскаго и все́х преподо́бных оте́ц на́ших о дарова́нии прошу́ моли́твы Иису́совой, моли́твы Пресвята́го и Всемогу́щаго И́мени Твоего́. Услы́ши мя́, обеща́вый услы́шати все́х призыва́ющих Тя́ во и́стине. Твое́ бо е́сть е́же ми́ловати и спаса́ти, и дарова́ти проси́мое моля́щемуся во сла́ву Твою́ со Отце́м и Святы́м Ду́хом. Ами́нь....