Республикон эндокринолог дипансеры специалисттӕ ацыдысты Алагирмӕ

Диамобиль арӕзт у поезды принципмӕ гӕсгӕ. Мидӕгӕй — нарӕг къӕлидор ӕмӕ фондз медицинон кабинет-купейы. Пациентты исынц гинеколог, офтальмолог, нефролог, эндокринолог ӕмӕ кабинет «Диабетикон къах»-ы специалист. Диагностикӕ райдайы цӕстыты дохтырæй. Офтальмоскопы руаджы аргъ скӕны суанг цӕсты бынты уавӕрӕн. Хъыгдард тугдадзинтӕ уайтагъд равдисынц сӕкӕры бӕрзонд ӕмвӕзад, ӕмӕ уый руаджы рабӕрӕг вӕййы ӕмбӕхст диабет ӕппӕты рагондӕр къӕпхӕныл дæр. Раст зӕгъын хъӕуы, арӕх медицинон кусджытӕ рабӕрӕг кӕнынц низы рагагъоммӕйы формӕ. Сӕкӕрнизы æууæлтæ канд цӕстыты уавæрæй нӕ рабæрæг вæййынц. Рефлекстæ фæлæмæгъ вæййынц кӕнӕ температурӕтæ дзæбæх нал фенкъары адæймаг. Æмæ уыдон дæр сты сагъӕссаг маркертӕ. Сӕрмагонд гарзы руаджы невролог бӕрӕг кӕны рынчыны реакци хъарм ӕмӕ уазалмӕ. Низы æууæлтæ йæм куы раиртаса, уæд æй арвитынц дарддӕр, эндокринологмӕ. Эндокринолог скӕны ног ӕркаст. Бӕлвырд диагноз сӕвӕры. Бутаты Солмӕ йӕ низы хатт рагӕй зоны. Фӕлӕ, сылгоймаджы хъуыдымæ гæсгæ, æнæниздзинады уавæр уæлдай хатт сбæрæг кӕныны æвзæрæй ницы ис. Ахæм басгӕрст у ӕнцонвадат. Æмæ Солмӕйы фӕнды ардӕм ногӕй ӕрбацӕуын. Бынативгæ поликлиникæйы бонмæ райсынц 30 адæймаджы онг. Машинӕйы ис ӕппӕт хъӕугӕ ифтонггарз. Техникӕ арӕзт у сæрмагондæй хъӕутӕн. Уым арӕх хъӕугӕ дохтыртӕ нӕ вӕййы. Диамобиьлмӕ бахауын та ӕнцон у. Æрмæст бынӕттон эндокринологӕй гæххæтт райсын ӕмӕ радмӕ банхъӕлмӕ кӕсын хъӕуы. Иннӕ хатт дохтыртӕ ацӕудзысты Елхотмӕ. Диамобилимæ иумæ Алагирмӕ ӕрцыдысты диабеты скъолайы специалисттӕ дӕр.