Йæ цардæй ахицæн зындгонд режиссёр æмæ сценарист Джусойты Мурат

Йæ цардæй ахицæн зындгонд режиссёр æмæ сценарист Джусойты Мурат. Цыдис ыл 64 азы. Институты размæ уыд Цæгат Ирыстоны паддзахадон драмон театры хуымæтæг кусæг, фæстæдæр сси уæлæмхасæн къорды артист, уыцы иу рæстæг куыста спортивон скъолайы уæгъдибар хъæбысхæсты тренерæй. Джусойты Мурат кинематографийы æппæтуæрæсеон паддзахадон университет каст куы фæци, уæд æй арвыстой Одессæйы киностудимæ. Уым систа цалдæр кинонывы – «Похищение Европы», «Курьер на Восток», «Фанат». Фæстæдæр сыздæхт Ирыстонмæ. Ам бакуыста адæмæн уарзон чи систы, ахæм нывтыл. Се 'хсæн «Хохаг», «Къоста» æмæ «Рудник». Фæстаг киноныв Италийы æппæтадæмон кинофестивалы сси дипломы аккаг. Режиссёры хорз чи зыдта, уыдоны ныхæстæм гæсгæ, Джусойты Мурат уыд ирд æмæ мидисджын кинонывтæ чи æвæрдта, уыцы режиссерты номхыгъды. Киноиндустримæ стыр бавæрæн, уыимæ къабазы бирæ азты дæргъы куысты фæдыл Джусойты Мурат хорзæхгонд уыд «Ирыстоны Намысы» майданæй.