ЖИРОВИЦКАЯ ИКОНА БОЖИЕЙ МАТЕРИ.

#ЖировицкаяиконаБожиейМатери Тропарь: Пред свято́ю Твое́ю ико́ною, Влады́чице, моля́щиися исцеле́ний сподобля́ются, ве́ры и́стинныя позна́ние прие́млют и ага́рянская наше́ствия отража́ют. Те́мже и нам, к Тебе припа́дающим, грехо́в оставле́ния испроси́, по́мыслами благоче́стия сердца́ на́ша просвети́ и к Сы́ну Твоему́ моли́тву вознеси́ о спасе́нии душ на́ших. Ин тропарь: По́мощи от Тебе́ тре́бующия не пре́зри, Влады́чице, и милосе́рдия бе́здну отве́рзи всем, притека́ющим к цельбоно́сней ико́не Твое́й. Печа́ли на́ша жите́йския утоли́, Всеще́драя, и от юдо́ли сея́ плаче́вныя к ра́дости ве́чней ве́рныя Твоя́ преста́ви: Тебе́ бо вси стяжа́хом, наде́жду и утвержде́ние, ми́лости исто́чник, покро́в и спасе́ние душ на́ших. Кондак: Вели́чия Твоя́ кто испове́сть, Пресвята́я Де́во, Творца́ всех Христа́ Бо́га Ро́ждшая? Еди́на бо еси́ Ма́ти и Де́ва, Преблагослове́нная и Препросла́вленная, упова́ние на́ше, исто́чник благосты́ни, ве́рным прибе́жище и ми́ру спасе́ние. Молитва: О, Премилосе́рдная Госпоже́, Де́во Богоро́дице! Ки́има устна́ма прикосну́ся ко святы́ни Твое́й или́ ки́ими словесы́ испове́м щедро́ты Твоя́, лю́дем явля́емыя: никто́же бо, притека́яй к Тебе́, отхо́дит тощ и не услы́шан. От ю́ности моея́ взыска́х по́мощи и заступле́ния Твоего́ и николи́же лише́н бых милосе́рдия Твоего́. Зри́ши, Госпоже́, ско́рби се́рдца моего́ и я́звы души́ моея́ ве́си. И ны́не, коленопреклоне́нно предстоя́ пред пречи́стым Твои́м о́бразом, моле́ния моя́ приношу́ Ти: не лиши́ мя всеси́льнаго...