Цыппӕрӕм полиниклиникӕйы сылгоймӕгты консультаци бындуронӕй цалцӕг кӕнынц

Æппынæдзух доны бын, уымæлад æмæ пырх къултæ. Ахӕм уавӕрты ма ӕрӕджы дӕр исын хъуыд 4-ӕм поликлиникӕйы сылгоймӕгты консультацийы пациентты. Чысыл цалцӕг кодтой ӕдзух, фӕлӕ уый фаг нӕ уыд. Ныр ам егъау ивддзинӕдтӕ ӕрцӕудзӕн. Ныртӕккӕ специалисттӕ халынц зæронд æрмæджытæ. Куыстыты ацы къæпхæн бирæ рæстæг бацахсдзæн. Ам фæзындзæн ног коммуникацитӕ, агъуыстыты сконд чысыл фæивдзысты, срӕвдз кӕндзысты къултӕ ӕмӕ пъолтӕ. 4-ӕм поликлиникӕйы сылгоймӕгты консультаци ис бирӕфатерон хӕдзары фыццаг уӕладзыджы. 1972-æм азы йæ сарæзтой. Медицинон кусæндон уӕдӕй фӕстӕмӕ бындуронӕй цалцӕггонд нæ уыд. Ныр та хуымӕтӕджы нырыккон не суыдзӕн. Пациенткæтæн дзы скӕндзысты ӕнцонвадат фӕлладуадзӕн бынӕттӕ. Сылгоймӕгты консультаци лæггад кæны 27 мин адӕймагӕй фылдӕрæн. Уыдон иууылдӕр, зӕгъӕн ис, æмӕ сты Цӕгат-Ныгуылӕн районы ӕппӕт цӕрджытӕ дӕр. Цалцæджы рæстæг уал пациентты исынц цыппӕрӕм поликлиникӕйы 1-æм филиалы. Фӕлӕ афæдзы кӕронмӕ кусджыты бон бауыдзӕн ноггонд бæстыхаймæ раздӕхын. Ӕппӕт куыстытӕ дӕр кӕнынц нацпроект «Дӕргъвӕтин ӕмӕ активон цард»- мӕ гӕсгӕ. Калманты Зæлинæ, Габолаты Виктория