Канон покаянный ко Господу нашему Иисусу Христу

Слушать канон покаянный ко Господу нашему Иисусу Христу Глас 6-й. Песнь 1. Ирмос: Я́ко по сýху пешешéствовав Изрáиль, по бéздне стопáми, гони́теля фараóна ви́дя потопля́ема, Бóгу побéдную песнь пои́м, вопия́ше. Припев: Поми́луй мя, Бóже, поми́луй мя. Ны́не приступи́х аз грéшный и обременéнный к Тебé, Влады́це и Бóгу моемý; не смéю же взирáти на нéбо, то́кмо молю́ся, глаго́ля: даждь ми, Гóсподи, ум, да плáчуся дел мои́х гóрько. Поми́луй мя, Бóже, поми́луй мя. О, гóре мне грéшному! Пáче всех человéк окая́нен есмь, покая́ния несть во мне; даждь ми, Гóсподи, слéзы, да плáчуся дел мои́х гóрько. Слава: Безýмне, окая́нне человéче, в лéности врéмя губи́ши; помы́сли житиé твоé, и обрати́ся ко Гóсподу Бóгу, и плáчися о дéлех твои́х гóрько. И ныне: Мáти Бóжия Пречи́стая, воззри́ на мя грéшнаго, и от сéти диáволи избáви мя, и на путь покая́ния настáви мя, да плáчуся дел мои́х гóрько.