СВЯТОЙ ПРЕПОДОБНЫЙ АНТОНИЙ РИМЛЯНИН, НОВГОРОДСКИЙ ЧУДОТВОРЕЦ.

#ПреподобныйАнтонийРимлянинНовгородскийчудотворец Тропарь: Ве́тхий Рим, оте́чество твое́, оста́вив, на ка́мень, я́ко на ле́гкий кора́бль, возше́л еси́ и на нем па́че естества́, а́ки безпло́тен, по вода́м ше́ствовал еси́, промышле́нием Боже́ственнаго ра́зума направля́емь, Вели́каго Нова́гра́да дости́гл еси́ и, оби́тель в нем сотвори́в, те́ло твое́ в ней предложи́л еси́, я́ко дар освяще́н. Тем мо́лим тя, о́тче Анто́ние: моли́ Христа́ Бо́га, да спасе́т ду́ши на́ша. Кондак: Ри́мское воспита́ние, Вели́кому же Нову́гра́ду благода́тное процвете́ние, мно́гими бо труды́ и по́двиги в нем Бо́гу угоди́л еси́. Сего́ ра́ди чуде́с дарова́ний от Него́ сподо́бился еси́, и те́ло твое́ мно́гими ле́ты соблюде́ нетле́нно. Мы же, сие́ лобыза́юще, ра́достно от души́ вопие́м ти: ра́дуйся, о́тче Анто́ние. Ин кондак: Я́ко звезда́, возсия́л еси́ от Ри́ма, и, доше́д Богоспаса́емаго Вели́каго Нова́гра́да, ту в нем оби́тель сотвори́л еси́, и, це́рковь поста́вив, созва́ и́нок мно́жество. С ни́миже моли́ о нас, чту́щих па́мять твою́, да зове́м ти: ра́дуйся, преподо́бне о́тче Анто́ние. Молитва: Па́стырю предо́брый и наста́вниче наш, преподо́бне о́тче Анто́ние! Ты во пло́ти еще́ сый, Боже́ственным манове́нием управля́емь, ве́тхий Рим оте́чество твое́ и род твой оста́вил еси́, и отту́ду чуде́сным по вода́м на ка́мени, я́ко на ле́гцем корабли́, прише́ствием твои́м се́мо освяти́л еси́ град сей, и в нем храм Бо́жией Ма́тери воздви́гл еси́, труды́ же и по́двиги твои́ми просвети́л еси́ оби́тель твою́...