Fikr | Abdukarim Mirzayev

Jamiyat har doim qatlamlarga bo‘lingan bo‘lib, bu tizimda taqlid va yuqoriga intilish (havas) asosiy harakatlantiruvchi kuchdir. Insonlar o‘zlaridan yuqori ijtimoiy qatlam vakillariga taqlid qilib, ularning xatti-harakatlarini, yashash tarzini va hatto maʼqul deb bilgan mulohazalarini qabul qiladi; shu bilan birga, o‘zidan pastdagi qatlamni inkor qilishga intiladi. Jamiyatning ertasi aynan shu eng yuqoridagi qatlamlarning qandayligiga bog‘liq. Agar ular kuchli bo‘lsa, pastdan kelayotganlar ham o‘sadi va jamiyat yaxshilanadi. Ammo agar yuqoridagilar poraxo‘r, usti yaltiroq, ichi bo‘m-bo‘sh bo‘lsa, quyi qatlamlar ham bu salbiy harakatlarni takrorlaydi, natijada umumiy buzilish boshlanadi. Shu bois, millatni, xalqni va davlatni tamsil qilayotgan har bir shaxs o‘zining har bir so‘ziga, harakatiga va taqdim etayotgan qiyofasiga juda diqqatli bo‘lishi shart. Yuqoridagilar o‘zlarini tuzatsa, pastdagilar ham tuzalib chiqadi.