Республикон центры «Доброе сердце»-йы сарӕзтой спортивон-ирхӕфсӕн мадзал сывӕллӕттӕн

Дзӕуджыхъӕуы, центр «Доброе сердце»-йы хъомылгæнинæгтæ фембæлдысты зынгонд спортсментимæ. Мадзал арӕзт ӕрцыд физкультурникы бонмӕ, ацы аз ӕй бӕрӕг кӕнынц 8 августы. Уазджытӕ фæсивæдæн скодтой тренировкӕ, радзырдтой спорты сӕ фӕндаджы тыххӕй ӕмӕ раргом кодтой профессионалон сусӕгдзинӕдтӕ. Программӕ баиу кодта цалдӕр здӕхты: тыхы фӕлварӕнтӕ, футбол, къӕдзӕхтыл бырын ӕмӕ сфӕлдыстадон блок. Мадзаларазджытæ — «Фӕсивӕды социализацийы центр», экстримы Федераци ӕмӕ республикӕйы комплексон хъӕбысхӕсты Федераци. Ахӕм фембӕлдтытӕ сывӕллӕтты зонгӕ кӕнынц ӕнцонвадат ӕмӕ зӕрдӕмӕдзӕугӕ спорты хуызтимӕ, уыимæ ма рӕзын кӕнынц дисциплинӕ ӕмӕ ныфс. Бæрæгбоны размæ Дзӕуджыхъӕуы Доны станцӕйы ацӕудзысты сӕйраг мадзæлттæ. Паддзахадон программӕ «Уӕрӕсейы Спорт»-ы фӕлгӕты уазджытӕм ӕнхъӕлмӕ кӕсынц ерыстӕ хъӕбысхӕстӕй, командон хъӕзтытӕй, уыимæ конкурстӕ «Кавказкий силач» ӕмӕ «Железная рука».