Цӕгат Ирыстоны ӕрцыд УФ-йы ӕнӕниздзинадхъахъхъӕнынады министрад сӕйраг трансплантолог Сергей Готье

Цӕгат Ирыстоны историйы уырджы фыццаг трансплантацийæ рацыд къуыри. 33-аздзыд Кокайты Оледжы ныридæгæн палатӕмӕ раивтой. Йе &ын аргъ скӕнынмӕ сӕрмагондӕй ӕрцыд бӕстӕйы сӕйраг трансплантолог Сергей Готье. Рынчын нырма дохтырты иугӕндзон цӕстдарды бын ис, йæ уавӕр — ӕнӕфӕцудгӕ. Ӕнтыстджын операци скодтой республикон клиникон рынчындоны. Оледжы донор сси йӕ мад. Проблемӕйыл фӕтых сты. Афтæ Цӕгат Ирыстоны медицинӕйы байгом бынтон ног гӕнӕнтӕ. Сӕйрагдӕр та рынчынӕн балӕвар кодтой ног цард. Нӕлгоймаджы уавӕр бонæй бонмæ æвзæрдæр кодта, ӕнӕ бирӕ сахӕтты дæргъы гемодиализӕй уырг нӕ куыста. Нӕ регион у, трансплантацийы программӕ кӕм скусын кодтой, уыцы фыццӕгтӕй иу. Абон нæм ис ӕппӕт хъӕугӕ бындур ахӕм бӕрзондтехнологион операцитӕн. Уымæй уæлдацй, реанимацийы ног хайад ӕмӕ 11 уӕлӕмхасӕн хуыссӕны. Ӕрӕджы дӕр ма ууыл зын баууӕндӕн уыд. Ног хъуыдыйæ трансплантацийы программӕ ауадзыны онг рацыд ӕртӕ азы бӕрц. Абон специалисттӕ цӕттӕ сты адӕмы цард хуыздæрырдæм ивынмӕ. Ӕнӕниздзинадхъахъхъӕнынады министр Митциты Астаны ныхӕстӕм гӕсгӕ, республикӕйы сараздзысты, ахӕм операци кӕй хъӕуы, уыцы рынчынты регистр. Тагъд рӕстӕджы ма уыдзæн ӕртӕ операцийы. Ӕппӕт рынчынтӕ ӕмӕ донортӕн ныртӕккӕ кæнынц иртæстытæ. Радон трансплантаци хъуамæ уа апрелы. Уыргты трансплантаци нырма райдайӕн у. Дарддæр ам фæнд кæнынц игӕр раивын дӕр. Кæд нырма ахӕм операци ӕрмӕст нысан у, уæддæр специалисттӕ ног нысанмæ ныфсджынæй цæуынц.