ХХХ улуустааҕы култуура үлэһиттэрин спартакиадатыгар "Киин" комо хамаандата - кыайыылаах (5.06.2025)

Бэс ыйын 5 күнүгэр «Манчаары» стадиоҥҥа уонна спортивнай-чэбдигирдэр кииҥҥэ ыытыллыбыт ХХХ-с улуустааҕы култуура үлэһиттэрин спартакиадатыгар «Киин» КОМО хамаандата 5 көрүҥ түмүгүнэн 6 очукуолаах тахсан кыайыы өрөгөйүн биллэ. «Киин» КОМО хамаандатыгар Майа сэлиэнньэтин Д.Ходулов аатынан норуот айымньытын дьиэтэ, Хара нэһилиэгиттэн «Айыллаан» култуура киинэ, 1 Тыыллыма нэһилиэгиттэн А.Алексеев аатынан култуура киинэ, Бөкө, Чүүйэ кулууптарын үлэһиттэрэ киирэллэр. Күрэхтэһии 5 көрүҥүнэн ыытылынна: волейбол, саастарынан эстафета, -электроннай-лазернай саанан ытыы, «Игра в кальмара» көрдөөх стартар уонна ханаат тардыһыыта. Спартакиадаҕа КОМОларынан арахсыбыт култуура үлэһиттэрин 5 хамаандата кыттыыны ылла: «Приленскай», «Киин», «Горькай», «МБК: музей, библиотека, Кыталык», «Геройдар». Спартакиаданы сыл ахсын улуустааҕы култуура үлэһиттэрин профсоюһа, бэрэссэдээтэлэ Эмма Максимовна Павлова уонна улуустааҕы култуура уонна духуобунай сайдыы управлениета тэрийэн ыытар. «Киин» КОМО хамаандата кыайыылааҕынан тахсан 30 000 сууммалаах сертификатынан наҕараадаланна. Бары спортсменнар 30-с үбүлүөйдээх спартакиадаҕа ананан оҥоһуллубут ураты көстүүлээх мэтээллэри көрүҥнэринэн уонна уопсай түмүгүнэн кэтэн үөрүүлэрэ үксээтэ. Хамаанда хапытааныгар Василий Плотниковка, хамаанданы сүүмэрдээһиҥҥэ, сүрүннээһиҥҥэ, дөкүмүөннэри бэлэмнээһиҥҥэ сүүрбүт-көппүт Елена Варламоваҕа, Татьяна Степановаҕа уонна бары кулууптар дириэктэрдэригэр махтанабыт. Өрүү маннык түмсүүлээх, кыайыы үктэллээх буолуоҕуҥ!