Д.Ходулов аат. народнай театр «Таайым - Дьоруой» испиктээгинэн 62-с театральнай сезонун түмүктээтэ

Муус устар 30 күнүгэр Д.Ходулов аатынан култуура киинигэр Д.Ходулов аатынан народнай театр уонна А.М.Алексеев аатынан Тыыллыматааҕы култуура дьиэтин холбоһуктаах үлэлэрэ көрөөччү дьүүлүгэр тахсыбыта. Былырыын аан бастаан Лоомтукаҕа Виталий Никифоров Алексей Ефремов туһунан «Эн сырдык ааккар сүгүрүйэн » диэн испиктээги туруорбута, биир дойдулааҕын аатын үйэтиппитэ. Онтон быйыл Алексей Ефремов дьоруойдуу быһыытын сырдатар испиктээк Майаҕа саҥардыллан туруорулунна. Алексей Ефремов - Лоомтукаттан төрүттээх, биир дойдулаахпыт, уоттаах сэриигэ 1941 сыллаахха 8 тааҥканы уматан хорсун быһыыны оҥорбута. Хомойуох иһин, оччотооҕуга Үрдүк наҕараадаҕа түспүт суругу командира төгүрүктээһиҥҥэ түбэһэн умаппытын туһунан биллэр. 10 сыл анараа өттүгэр Ф.Г. Охлопков аатынан Майа орто оскуолатын дириэктэрэ Мотрена Петровна Птицына салайан таһаарбыт «Дорога памяти» хомуурунньукка бу оскуола 5 кылааһын үөрэнээччитэ Болуров Ярослав өйтөн суруйуутугар аймаҕын Алексей Ефремов туһунан кэпсээнигэр олоҕуран, ол саҕана учууталынан үлэлии сылдьыбыт Наталья Пахомова испиктээк сценарийын суруйбут. Режиссер Данил Осипов эттээн-сииннээн, сыанаҕа таһаарда. Кини биографическэй испиктээк хайысхатыгар бу хаһыс да үлэтэ буолар. Испиктээги Алексей Ефремов аймахтара кэлэн көрдүлэр, биһирэбиллэрин биллэрдилэр.