PESHIN VA ASR namozlarini kechga bitta qilib o'qisa bo'ladimi? QAZOSI QANDAY OʻQILADI. QAZO-2024

Qazo namozlarini ado etish Besh vaqt namozni o‘z vaqtida o‘qish «ado», uzrli sabab bilan vaqti o‘tganidan keyin o‘tash «qazo» deyiladi. Uzrli sabab bilan vaqtida o‘qilmagan farz va vitr namozlarining qazosi o‘qiladi. Juma, hayit (iyd), janoza, sunnat namozlarining qazosi o‘qilmaydi. Faqat bomdod namozining sunnati o‘sha kuni tushgacha farzi bilan birga o‘qiladi. Farz namozlarini o‘z vaqtida o‘qish qat’iy lozimdir. Kim namozning vaqtini uzrsiz o‘tkazib yuborsa, gunohi kabiralardan birini qilib qattiq gunohkor bo‘ladi. Qur’oni Karimda shunday marhamat qilinadi: «Albatta, namoz mo‘minlarga vaqtida farz qilingandir» (Niso surasi, 103-oyat). Ammo ba’zi uzrlar sababi bilan namoz qazo bo‘lishi mumkin. Bu uzr ikki xil bo‘ladi: 1. Qazosi o‘qilmaydigan uzrlar: a) hayz va nifos ko‘rgan ayollar namozni tark qilishadi, pok bo‘lishgandan keyin ham qazo bo‘lgan namozlarini o‘qishmaydi. b) kamida olti vaqt namoz muddatida hushidan ketib, o‘ziga kelmagan ham o‘ziga kelgach, qazo bo‘lgan namozlarini o‘qimaydi. Lekin bundan kam fursatda o‘ziga kelsa qazo bo‘lgan namozlarini o‘qish unga vojib bo‘ladi. 2. Qazosi o‘qiladigan namozlar: Uxlab qolish, esidan chiqish, g‘aflatda qolish, boshini ham qimirlata olmaydigan darajada kasal bo‘lish kabi uzrlar bilan namoz o‘z vaqtida ado qilinmasa, uning qazosini o‘qish vojib bo‘ladi. Qazo namozlarini o‘qishni beuzr kechiktirish joiz emas. Rizq topishga harakat, farz ilmlarini talab qilish, o‘ta och qolgan kishilarning ovqatlanib olishi, nihoyatda...