"Базарлар жана автоунаа оңдоочу жайлар шаар сыртына чыгарылат" Ташиев Жалал-Абадды текшерди.

Бүгүн, 23-июлда Министрлер кабинетинин төрагасынын орун басары - УКМК төрагасы Камчыбек Ташиев Жалал-Абадда администрациянын жаңы имаратынын курулушунан кабар алды. Анда курулушту сапаттуу жана тез бүткөрүү, жаңы имараттын айланасын иретке келтирүү боюнча тиешелүү тараптарга тапшырма берилди. Жалал-Абадда жаңы филармония салынат. Ага эки гектардан ашык жер ажыратылып, курулушту баштоого даярдыктар жүрүүдө. Ал эми УКМК төрагасы филармониянын жанына жаңы музей салууга жер бөлүп берүү тапшырмасын койду. Алдыда Жалал-Абад шаарынын ичиндеги бардык базарлар, автоунаа оңдоочу жана тейлөөчү жайлар шаар сыртына чыгарылат. Ал эми Тумөнбай Байзаков проспектиси кеңейтилип, шаар ичи толугу менен иретке келтирилет. Камчыбек Ташиев “Жеңиш” паркындагы курулуш иштеринен кабар алды. Сейил бакты эл эс ала тургандай жайлуу, коопсуз кылып салууну жана сапатына көңүл бурууну эскертти. Аны менен катар парктагы согуш окуяларынын жана тарыхый инсандардын эстелиги үчүн өзүнчө жай уюштурууну тапшырды. Камчыбек Ташиев чет өлкөдө жүргөн кыргызстандык жарандар мекенге келип, ишкердик баштаса бийлик тарабынан колдоого алынаарын белгиледи.