Гаяз Закиров: «Кешеләргә файдалы булу – зур бәхет!»

Түбән Новгород өлкәсе мөселманнары диния идарәсе рәисе, казый Гаяз Закировның 70 яшьлегенә әзерләнгән телевизион фильм Гаяз Салих улы 1955 елда Нижгар төбәгендәге татар авылларының берсе – Ишавылда туган, милли гореф-гадәтләр, мөселман йолалары үтәлгән әби-бабайлы гаиләдә тәрбияләнгән. Татар мәктәпләрендә белем алган. Аеруча, татар, рус һәм чит ил язучыларының әсәрләрен яратып укыган. Хәзрәт хәзер дә күп укый һәм әдәби әсәрләрдән өзекләрне яттан сөйли. 1977 елда Гаяз Закиров Дзержинск шәһәрендәге химия заводына эшкә урнаша. Илдәге үзгәртеп кору чоры белән килгән дини яңарыш елларында дин нигезләрен өйрәнә башлый. Шул ук вакытта Дзержинск газетасына милли тормыш турындагы мәкаләләр яза. 1989 елда Дзержинск шәһәре мөселманнарына мәчет итеп файдаланырга йорт бирелгәч, Гаяз Закировны рәсми имам итеп сайлап куялар. Аңа 35 яшь була. Бер үк вакытта шәһәрнең татар иҗтимагый оешмасы рәисе һәм шундый ук өлкә өлкә оешмасының рәис урынбасары вазифаларын да башкара. Гаяз Закиров Дзержинск һәм Түбән Новгород шәһәрләрендәге төбәк милли-мәдәни мөхтәриятләрен оештыру башында торган һәм аларны җитәкләгән шәхес. 2008 елдан Гаяз Закиров Түбән Новгород өлкәсе мөселманнары диния идарәсен җитәкли. Хәзер өлкә диния идарәсе составында 57 мәхәлләгә берләшкән 60 мәчет эшли. Нижгар төбәгендәге кайбер татар авылларында берничә Аллаһ йорты бар. Мәсәлән, теолог һәм дин белгече Хөсәин Фәизхановның туган авылы Сафаҗайда - 5, ә Гаяз хәзрәтнең туган авылында 3 мәчет бар. Дзержинск шәһәрендә Җәмигъ мәчет...