"Дар сӯги Бозор Собир" шеъри Исмоил Зарифӣ, садои Субҳон Ҷалилов

ДИЛАМ ДАР МОТАМИ БОЗОР БИГРИСТ Дилам дар мотами Бозор бигрист, Барои шоири бедор бигрист. Ҷаҳон дар пеши чашмонам сияҳ шуд, Дилам такрор бар такрор бигрист. Завонам вирд мекард номи шоир, Танам дар қолаби хуншор бигрист. Нигаҳбони «Забони модарӣ» рафт, Ба ёдаш дафтари ашъор бигрист. Замин бигрист андар марги шоир, Само бар ламъаи анвор бигрист. «Гули хор»-аш ба «Симхор» аст «Пайванд», На танҳо гул, барояш хор бигрист. Ба ғам пайваст ӯ қишлоқакашро, Ба ҳасрат ҳар дару девор бигрист. Барои шоири миллат дар ин рӯз, Хуморӣ гашта сад Аттор бигрист. Ба Мирзо рӯҳи Айнӣ ин нидо дод: Ки шоир рафту қалби зор бигрист. Ба сӯяш буд сад «Чашми сафедор», Ба ҳасрат мардуми бемор бигрист. Садояш гашт андар сина пинҳон, Бар маргаш булбули гулзор бигрист. Ба хоки тар басо «Хуни қалам» рехт, Зарифӣ, бо дили афгор бигрист. шеъри Исмоил Зарифӣ дар сӯги Бозор Собир, садои Субҳон Ҷалилов Исмоил Зарифӣ - шоири тоҷик, ки чанд марсияашро ба Бозор Собир бахшидааст, дар яке аз онҳо ба бадгӯёни вай чунин посух гуфтааст: Ҷаҳон бигрист андар марги шоир, Шумо миред ҳаргиз кас нагиряд. Фалак сад нола дорад дар ғами ӯ, Шумо миред хору хас нагиряд. Надоред қадри гарди домани ӯ, Ҳасудони дили бемори шоир. Гуноҳаш аз Шумо авлост, авлост, Аё вомандагони доми тазвир. Худо худ қозии рӯзи ҷазо ҳаст,...