Цæгат Ирыстоны цæуы профессионалон дæсныдзинады чемпионат "Мастерята Аланийи 2026"

Агъуыст ныссабыр. Сывæллæттæ сæ ных сарæзтой бæрæггæнæнтæм. Хъæуы сæ электрон тыхы системæйы хæйттæ сæмбырд кæнын. Бæрнон хæслæвæрд уайтагъд баххæст кодта 9-аздзыд Дзæгъиаты Ибрагим. Лæппу телтæ иууылдæр раст баиу кодта. Ацы архайды йæхи æрмæст æртæ мæйы фæлвары, фæлæ ныридæгæн бирæ ногдзинæдтæ базыдта. Чемпионат "Мастерята"-йы уæлахиздзау суæвынмæ æрмæст Ибрагим нæ бæллы. Максим Зиновченков ныр дыууæ азы иртасы "Æнæпилотон авиацион системæтæ". Лæппу конкурсмæ бæстонæй цæттæ кодта æмæ равдыста хорз бæрæггæнæнтæ. Æнцонæй баххæст кодта æппæт хæслæвæрдтæ æмæ сæрæнæй архайдта тæхæг аппаратимæ. Æмткæй компетенци "Æнæпилотон авиацион системæты" архайдтой 20 æвзонг конкурсанты. Ныридæгæн сæ алчидæр симулятортыл кусын зоны, дронтæн разамынд дæттын дæр зонынц. Ирон чъириты хæрздæф æмæ хæрзад хуызæй архайджыты ацы фæзæй сæ къах нал хаста. Компетенцийы архайынц 15 чызджы. Алчидæр сæ хъуамæ 2 сахатмæ сцæттæ кæна æртæ кæрдзыны. Чысыл хæринаггæнджыты фарсмæ балæууыдысты фæлтæрдджын специалисттæ. Чемпионаты сæйраг эксперт Алла Столбовская зæгъы, куыстытæн аргъ скæнын æнцон нæ уыд. Чемпионат "Мастерята-2026"-ы ацы аз æгас республикæйæ архайдтой æртæ сæдæ курдиатджын сывæллонæй фылдæр. Фæсивæд ерыс кодтой 15 компетенцийы, уыдонæй æртæ ацыдысты Æрыдоны аграрон-технологон колледжы бындурыл. Конкурс Цæгат Ирыстоны сси традицион æмæ равдыста — æрыгон фæлтæр цæттæ у бæрнон хæстæ æххæст кæнынмæ, сæ райрæзтыл кусынмæ æмæ хъæугæ дæсныйæдтæ ахуыр кæнынмæ.