Хъыгдард æнæниздзинадимæ сывæллæтты центр "Фидæн" кусы æртæ мæйы

Фынддæсаздзыд Валерия арæхстгай ахоры æлыгæй зæрдæ. Йæхæдæг æй скодта. Хъыгдард æнæниздзинадимæ сывæллæтты центр "Фидæн"-ы кусджытæ алы ахуыры дæр архайынц аргъауы уддзæф бауадзын. Æмæ ам æрхæндæг ничи фæкæны. Чызг ныв кæны корейаг мифологиы хъайтары. Цымыдисаг Кицунэйы тыххæй йын радзырдта йæ нана. Центр "Фидæн" Цæгат Кавказы фыццаг у. Байгом æй кодтой хæдзар-интернат "Ласка"-йы бындурыл. Ардæм цæуынц сæ нервыты куыст хæлд кæмæн у, ахæм сывæллæттæ 12-æй 18 азы онг. Специалисттæ сæ ахуыр кæнынц хæдхом уæвын. Зæгъæм, æнæ хистæрты æххуысæй хæринаг скæнын. Ам хæдзарон кустытæ базонынæн æцæг æрмадз ис. Сцæттæ кæнынц змæстæг, лауызтæ, луаситæ. Ахæм зонындзинæдтæ сывæллæтты бахъæудзысты. Программæ афтæ сарæзтой, цæмæй йæ сывæллæттæ æмбарой. Ам ма кæнынц зæххы куыст дæр. Æрзайын кæнынц цæхæрагæрдæг. Сыхаг агъуысты — полиграфи. Хъомылгæнинæгтæ сæхæдæг скæнынц блокноттæ цыфæнды нывтимæ дæр. Центры специалисттæ кусынц сæрмагонд программæтæм гæсгæ. Алы сывæллоны гæнæнтæ дæр хицæнæй хынцынц. Зынæй дзы ницы ис, зæрдæмæдзæугæ архайд сæ алкæмæн дæр æрхъуыды кæнынц. Тæлфаг чи у, уыдон кафынц, зарынц. Сæхи афтæ æнкъарынц, цы ма æцæг артисттæ сты. Æрæджы "Ласка" рамбылдта æппæтуæрæсеон конкурсы грант. "Фидæн" дæр уый фæрцы фæзынд. Хæлæрттæ ссарын, фидæны дæсныйад равзарын — ахæм нысантæ бафтынц хъомылгæнинæгты къухты. Центр кусы æрмæст æртæ мæйы, фæлæ йæ æнтыстытæ гыццыл не сты. Фæсивæды, æцæгдæр, фæфæнды ардæм. Уадз, æмæ сæ фидæн рухс æмæ хъæлдзæг рауайа.