То ғолиб омаданаш науфтод, гарчӣ инро интизор буданд

Мӯъмин Қаноат соли 1976 дар 44 солагӣ раиси Иттиҳодияи нависандагони Тоҷикистон шуд. Ин яке аз вазифаҳои калидӣ дар овони Шӯравӣ буд , аз вазъи ғарибонаи ҳолои он фарқ мекард, обрӯйи хос дошт. Қаноат аз соли 1968 дар ин анҷуман муовини Турсунзода буд. Раис шудани ӯ бори души шоирро сангинтар кард ва ҳасудонашро зиёдтар. Шикоятномаҳои бепояву тӯҳматномаҳо ба Кумитаи марказӣ мерехтанд. Ин марҳиллаи мубориза бо қавмгароиву гурӯҳгароиву беш дидани худу кам дидани дигарҳо буд. Қаноат гуфт, ин замон танҳои танҳо монд. Эҳсос мекард, агар кӯмаке нагирад, мешиканад. Соли 1976 фикри навиштани достони "Суруши Сталинград" ба миён омад. Бошитоб онро навишт ва якчанд вақт бо дӯсташ Роберт Рождественский дар утоқе дар шаҳри Маскав барои тарҷума хилват гузиданд. Соли 1977 ин достон ба забони русӣ нашр шуд ва Мӯъмин Қаноат бо ҷоизаи аввали Иттиҳоди Шуравӣ ба Душанбе баргашт. "Даҳани душманон баста шуд" , дар хулосаи нақл гуфт Қаноат. Ин Сталинград ҷони шоир аст, ки пеши ҳуҷумхои равонӣ меистод. Дар баробари тохтанхо то ғолиб омаданаш науфтод, гарчӣ инро интизор буданд.