СВЯТИТЕЛЬ ТАРАСИЙ, ПАТРИАРХ КОНСТАНТИНОПОЛЬСКИЙ.

#СвятительТарасийПатриархКонстантинопольский Тропарь: Пра́вило ве́ры и о́браз кро́тости, воздержа́ния учи́теля яви́ тя ста́ду твоему́, я́же веще́й и́стина, сего́ ра́ди стяжа́л еси́ смире́нием высо́кая, нището́ю бога́тая. О́тче Тара́сие, моли́ Христа́ Бо́га спасти́ся душа́м на́шим. Кондак: Правосла́вными догма́ты Це́рковь уясни́в, и Христо́ву, блаже́нне, честну́ю ико́ну почита́ти и покланя́тися всех научи́в, обличи́л еси́ иконобо́рцов безбо́жное веле́ние. Сего́ ра́ди вопие́м ти: о о́тче, ра́дуйся, му́дре Тара́сие! Молитва: О, всехва́льный святи́телю Христо́в и чудотво́рче Тара́сие! Приими́ сие́ ма́лое моле́ние от на́с гре́шных, к тебе́ прибега́ющих, и те́плым твои́м предста́тельством умоли́ Го́спода и Бо́га на́шего Иису́са Христа́, я́ко да, призре́в на ны́ ми́лостивно, да́рует на́м согреше́ний на́ших во́льных и нево́льных проще́ние, и по вели́цей Свое́й ми́лости изба́вит на́с от бе́д, печа́лей, ско́рби и боле́зней душе́вных и теле́сных, обдержа́щих на́с; да пода́ст земли́ плодоно́сие, и вся́, я́же на по́льзу настоя́щаго жития́ на́шего потре́бная; да да́рует на́м сконча́ти житие́ сие́ привре́менное в покая́нии, и да сподо́бит на́с гре́шных и недосто́йных Небе́снаго Ца́рствия Своего́, со все́ми святы́ми сла́вити Его́ безконе́чное милосе́рдие, со Безнача́льным Его́ Отце́м и Святы́м и Животворя́щим Его́ Ду́хом, во ве́ки веко́в. Ами́нь.