Дзæуджыхъæуы байгом гипермаркет "Лента"

Дуканийы фæзуат - 5 400 квадратон метры. Ам ис æппæт хъæугæ товартæ дæр. Дыргътæ æмæ халсартæ, дзидза, уæлæдарæс æмæ хæдтулгæтæн хъæугæ товартæ. Дуканийы сæйраг хъуыды - ныллæг æргътæй. Уыимæ компани базарадон объект байгом кæны регион хицæндзинæдтæ хынцгæйæ. Дуканийы тæрхæджыты 29 мин алыхуызон товары, куыд федералон, афтæ регионалон продукци. Зæгъын хъæуы уый, æмæ уыцы хъуыддагыл рагагъоммæ куыстой републикæйы хъæууон-хæдзарады министрадимæ. Ис дзы, зæгъæм, ирон спаржæ, æмæ канд уый нæ. Республикæйы æмæ гипермаркеты разамынд æмгуыстады бардзырд бафыстой фарон. Абон дукани гом кæнын кадджын мадзалы республикæйы сæргълæууæг базарадон центры разамынд æмæ кусджытæн загъта арфæйы ныхæстæ. Сергей Меняйлойæн равдыстой дуканийы товарты хуызтæ, радзырдтой чи сæ кæны æмæ кæцæй ласт сты, уый дæр. Сæргълæууæг та фыццаджыдæр бафарста республикæйы цæрджыты хъуыды ацы цауы тыххæй. Кадджын мадзалы сæдæгай адæм. Ам сын сарæзтой стыр бæрæгбон, уæлдайдæр та сабитæн, уыдонимæ хъазыдысты аниматортæ. Хистæртæм та æнхъæлмæ кастысты конкурстæ. Адæм кæсынц тæрхæджытæм, æвзарынц сæхицæн цы балхæндзысты, уый. "Лента" ныридæгæн кусы нæ бæстæйы 650 горæты. Гипермаркеты разамынд куыд зæгъынц, афтæмæй сæ куыст парахат кæнынц райрæзтмæ тырнгæйæ. Цæгат Ирыстоны туристты нымæц фылдæр кæй кæны, уый дæр сын пайда у сæ архайды. Базарадон центры ис 145 куысты бынаты. Фæллой дзы кæнынц республикæйы цæрджытæ. Дукани кусдзæн æхсæвæй-бонæй. Адæмæн лæггад кæндзысты бæрзонд æмвæзадыл.