СТИХИРЫ НОВОМУЧЕНИКАМ И ИСПОВЕДНИКАМ РОССИЙСКИМ

Стихиры святым по запричастном стихе. Глас 5, подобен "Радуйся": Ра́дуйтеся, страстоте́рпцы сла́внии,/ стопа́м после́дующе́ дре́вних му́ченик, / ве́ры ра́ди подвиза́стеся тве́рдо / в лю́тая времена́ земли́ на́шея / и ны́не всех подвиза́ете к сла́ве и хвале́нию Бо́га, / укре́пльшаго ва́ше немощно́е естество́ / и обогати́вшаго вас дарова́ньми Ду́ха, // во спасе́ние душ на́ших. Прииди́те, Небе́снии предста́телие на́ши, к нам, / ва́шего ча́ющим ми́лостивнаго посеще́ния, / и изба́вите озло́бленныя мучи́тельскими преще́нии / лю́таго неи́стовства неве́рных, / от ни́хже, я́ко пле́нницы и на́зи, гони́ми есмы́, / от ме́ста на ме́сто ча́сто преходя́ще / и заблужда́юще в верте́пех и гора́х. / Уще́дрите у́бо, прехва́льнии, / и да́руйте нам осла́бу, утоли́те бу́рю/ и угаси́те е́же на ны негодова́ние, / Бо́га моля́ще, // подаю́щаго ва́ми земли́ на́шей ве́лию ми́лость. Глас 8, подобен «О, преславного чудесе…» О, пресла́внаго чудесе́! / В после́дняя времена́ возсиява́ют му́ченицы / и пре́лести мрак отгоня́ют, / ве́ра христиа́нская ны́не возвыша́ется / и па́дает нече́стие, / ра́дуются ве́рнии / и пра́здник новоявле́нным составля́ют, / вопию́ще Христу́ Бо́гу:// му́чеников похвала́ и побе́да Ты еси́, Всеси́льне.