Линда Захарова "ТУОЙ-ХАЙА ФЕСТ 2025" ырыа күрэҕин 2 сүүмэрдиир түһүмэҕэр (11.07.25)

Линда Захарова Мэҥэ Хаҥалас улууһун Хорообут нэһилиэгиттэн төрүттээх. Кини айар куттаах Сергучевтар дьиэ кэргэн биир талааннаах ыччата. Эһээтэ, аҕата, таайдара, эдьиийэ курдук ырыа айар, оҕо эрдэҕиттэн ыллыыр. Билиҥҥи кэмҥэ Линда Майа сэлиэнньэтин Д.Ходулов аатынан норуот айымньытын дьиэтигэр уус-уран салайааччынан үлэлиир, улууспут кэскиллээх ыччата буолар. Майаҕа үлэлии кэлиэҕиттэн Линда үгүс ситиһиилээх, араас бырайыактарга кыттар, төрөөбүт улууһун чиэһин элбэхтэ көмүскүүр. Ырыаһыт быһыытынан араас кэнсиэрдэргэ, күрэхтэргэ кыттар. Ол курдук, 2024 сыллаахха Линда "Муус устар 2024" өрөспүүбүлүкэтээҕи ыччат бэстибээлин чэрчитинэн ыытыллар "СулуСТАР 2024" ырыа күрэҕэр финалга киирэн 3 миэстэ буолары ситиспитэ, Нам улууһугар ыытыллыбыт "Кылаан чыпчаал" ырыа күрэҕэр 1 истиэпэннээх лауреат, Аммаҕа Ф. Потапов аатынан норуот айымньытын дьиэтигэр ыытыллыбыт «Мин дууһам ыллыыр» диэн ырыа айааччыларга уонна биирдиилээн толорооччуларга өрөспүүбүлүкэтээҕи ырыа күөн күрэҕэр «Ырыа айааччылар» түһүмэххэ 2 истиэпэннээх лауреат, «Биирдиилээн толорооччулар» түһүмэххэ 2 истиэпэннээх лауреат, 46-с төгүлүн ыытыллыбыт "Мүрү" ырыа күрэҕэр 3 истиэпэннээх лауреат. 2025 сылга - Мэҥэ-Хаҥалас улууһун Бэдьимэ нэһилиэгэр Сергей Винокуров сырдык кэриэһигэр анаммыт «Сулус буолан сандаарыам» аһаҕас ырыа күрэҕэр «Кылаан Чыпчаал» буолары ситистэ. Линдаҕа айар үлэтигэр ситиһиилэри баҕарабыт!