Мирзо Турсунзода

Мирзо Турсунзода дар деҳаи Қаратоғи ноҳияи Ҳисор дар оилаи дуредгар таваллуд шуда, дар шаҳри Душанбе даргузаштааст. Аз соли 1946 то рӯзи вафоташ раиси Иттифоқи нависандагони Тоҷикистон буд. Соли 1951 академики Академияи илмҳои Тоҷикистон интихоб шуд. Китобҳои сершумораш бо забонҳои гуногуни олам ба табъ расидаанд. Соли 1948 барои қисми якуми силсилаи шеърҳои «Қиссаи Ҳиндустон» («Рӯди Ганг», «Меҳмони мағрибӣ», «Тара Чандрӣ», «Боғи муаллақ» ва «Дар ёди кас») ба дарёфти Ҷоизаи давлатии Иттиҳоди Шӯравӣ мушарраф гардид. Соли 1960 барои достони «Ҳасани аробакаш» ва силсилаи шеърҳои «Садои Осиё» сазовори Ҷоизаи давлатии Ленинӣ гардид. Соли 1963 барои достони «Ҷони ширин» ба дарёфти Ҷоизаи давлатии Ҷумҳурии Тоҷикистон ба номи Абӯабдуллоҳи Рӯдакӣ сар¬фароз гашт. Ин ходими намоёни давлатӣ ва ҷамъиятӣ бо ордену медалҳои сершумори СССР ва мамлакатҳои хориҷӣ мукофотонида шудааст. Соли 1961 аввалин маротиба дар ҷумҳурӣ ба ӯ унвони Шоири халқии Тоҷикистон дода шуд. Ҳукумати ҷумҳурӣ ӯро баъд аз вафот бо унвони олии Қаҳрамони Тоҷикистон тақдир кард. Устод Мирзо Турсунзода дар давоми тамоми роҳбари¬аш ба Иттифоқи нависандагони Тоҷикистон барои рушди адабиёти бачаҳо диққати махсус медод ва худ барои навра¬сону навҷавонон шеъру манзумаҳои ҷолиб меофарид. Аз соли 1934 узви Иттифоқи нависандагон буд.